Апрель ае - Тукай ае. Ул - бөек шагыйрьне тудырган ай. Татар халкы үзенең җырчы улын һәрчак күңел түрендә тота. Бу айда күп төрле чараларның уздырылуы - шуның ачык мисалы. Безнең балалар бакчасында без иң элек балаларны аның тормыш юлы, ятим бала чагы белән таныштырабыз. Төрле альбомнар, презентацияләр карыйбыз. Аннан соң нәниләр күңелен шигърият били. Шагыйрьнең сабыйлар өчен язган шигырьләрен ятлыйбыз һәм аның сүзләренә язылган җырларны өйрәнәбез. Менә нәниләр инде ничә буын балаларын үзенә тарткан могҗиза-әкият дөньясында. Ләкин алар әкият тыңлап кына калмыйлар, үзләре дә әкият геройларын сурәтләп, төрле рәсемнәр ясыйлар. Ул әсәрләрне үз күңелләре аша үткәреп әкият дөньясы төзиләр. Шуңа күрә дә балалар иҗатында күбрәк зәңгәр күлдәге Су анасы яки урман пәрие Шүрәле тасвирлана.Туган көнендә генә түгел, балалар бакчасыннан башлап мәктәпне бетереп чыкканчы, балаларны Тукайдан аермаска иде.