Туган тел! Һәркем өчен дә газиз сүз бу. Иң кадерле “әти”, “әни”, “әби”. “бабай” сүзләрен туган телдә әйтәбез. Туган телебезнең, торган җиребезнең кадерле булуын без иң элек туган тел аша тоябыз.
21 февраль- Халыкара туган тел көнендә барлык телләр дә тигез дәрәҗәдә итеп таныла. Һәр халыкның туган теле – аның мәдәнияте, тарих көзгесе.
Безнең балалар бакчасында да төрле милләт балалары үзара аралашып дус яшиләр. Алар үз гаиләләрендә үз традицияләре, гореф-гадәтләре нигезендә тәрбияләнә, шул ук вакытта башка халыкларның йолаларын да өйрәнә, хөрмәт итә. Кайсы милләттән булулары аларның  тату гаилә, бердәм коллектив булуына комачауламый. Һәр елны бакчабызда дөньякүләм Туган телләр көнен үткәрү зур бәйрәм буларак көтеп алына.  Бүген дә бакчабызда  туган телебезгә багышланган " И туган тел..." исемле  әдәби- музыкаль кичә үткәрелде. Кичәдә татар балалары белән беррәттән рус , чуваш, әрмән балалары да катнашты. Алар  үз туган телләрендә матур итеп шигырь сөйләделәр, җырлар җырладылар. Аларның үзара дус- тату, бердәм  яшәүләренең ачык мисалы чагылды.  Кичә бөек татар шагыйре Габдулла Тукайның «И, туган тел!» җыры белән тәмамланды.