ЮНЕСКО  тарафыннан 21 нче февраль – Халыкара туган тел көне дип билгеләп үтелә. Һәрберебезгә мәгълүм, бу оешма дөнья халыкларының матди булмаган мирасын саклау өчен көрәшә, традицион яисә халык музыкасын, биюләрен, гореф-гадәт һәм йолаларны, авыз иҗатын һәм төп җирле халыкларның туган телләрен саклап калу буенча зур эшчәнлек алып бара. Ә халыклар юкка чыкмасын, аларның телләре саклансын өчен тырышу — бу Җир шарында мәдәниятнең күп төрлелеген саклап калу дигән сүз. 

Һәр милләт кешесе өчен иң матур, иң кадерле тел - үзенең туган теле.  20 нче февраль көнне, Халыкара туган тел көнен билгеләп үтү максатыннан  2 нче лицейда шәһәр күләмендә “Туган телем-иркә гөлем” дигән ачык чара үткәрелде. Чараны 2 нче лицейның татар теле һәм әдәбияты укытучылары уздырды. Бәйрәмгә шәһәребез мәктәпләреннән татар теле укытучылары, укучылар җыелды. Кунакка күчтәнәчсез йөрмиләр. 1,7,8,16, нче мәктәп укытучылары  үзләре белән төрледән-төрле матур чыгышлар алып килгәннәр иде. Укучылар төрле телләрдә туган тел турында  шигырьләр сөйләделәр, милли җырлар җырладылар, биюләр биеделәр. Ачык чара презентация белән үрелеп барды. Аның ярдәмендә илебездә яшәгән төрле халыкларның гореф-гадәтләре, бәйрәм һәм көнкүреше турында слайдлар күрсәтелде. Тирән эчтәлекле җырлы-биюле тамаша беркемне дә битараф калдырмады. Бәйрәм ике телдә – рус һәм татар телендә барды. Милли киемнәр кигән балалар бәйрәмнең бизәге иде. 

Кичәбез “Туган тел”не бергә җырлап тәмамланды.

Татар теле һәм әдәбияты укытучысы Невметулина Гөлнара Флурис кызы.