Татарстан Республикасында яшәүче халыклар вәкилләренең туган телен, мәдәниятен һәм гореф-гадәтләрен саклау һәм үстерү, республиканың күпмилләтле халкы бердәмлеген ныгыту максатында Татарстан Президенты Рөстәм Миңнеханов 2021 нче елны Туган телләр һәм халыклар бердәмлеге елы дип  игълан итте. 
Шул уңайдан 21 гыйнвар көнне 2 нче лицейда бу истәлекле вакыйгага багышланган «Туган телем, назлы гөлем» дип аталган чараны ачу тантанасы узды. Һәр халыкның туган теле – аның мәдәнияте, тарихи көзгесе. Кичәнең кунаклары -  шәһәребезнең татар милли мәдәният үзәге вәкилләре. 9Г сыйныф укучылары, килгән кунаклар китапханәдә оештырылган китаплар күргәзмәсе белән таныштылар. Татар милли мәдәният үзәгенең җитәкчесе Флюра Вәли кызы Шәрипова укучыларга туган тел турында шигырьләр укыды. Гөлгенә Нәгыйм кызы Афзалова, Регина Фәһим кызы Нәҗмиева, Эдуард Олег улы Гафиятуллинның моңлы җырлары кичәдә булган бар кешене таң калдырды. Баянчы Нәҗип Сәүбән улы Кильдияровның сыздырып матур итеп татар көйләрен уйнавы бәйрәмебезгә тагын да ямь өстәде. Укучылар да чарада актив катнаштылар. 
Коронавирус йогышлы авыруын таралуны булдырмау максатыннан Роспотребнадзор тарафыннан каралган барлык тәкъдимнәр, таләпләр искә  алынды.