2010нчы елның 1нче сентябреннән бирле Россиякүләм балалар "Ышаныч" телефоны эшли. Халыкара балалар ышаныч телефоны көнен билгеләп үтүгә Россиядә 2009нчы елда кушылдылар. Бу бәйрәм 17нче май көнне билгеләп үтелә. Агымдагы елда әлеге бәйрәм "Авырлыкта да - бергә" девизы астында узды. Ышаныч телефоны буенча бала аноним рәвештә квалификацияләнгән психологик ярдәм алачак. Шулай ук бу номер буенча гаиләдә һәм аннан тыш физик көч куллану очраклары буенча да ярдәм сорарга мөмкин. Россия күләм ышаныч телефоны 8-800-2000-122(гади телефоннан да, кесә телефоныннан да шалтырату бушлай).

        Халыкара балалар ышаныч телефоны көне уңаеннан мәктәбебездә күптөрле чаралар үткәрелде. Класс сәгатьләрендә ,тематик дәресләрдә, мәктәпкүләм линейкада, гомуми ата-аналар җыелышында аңлату эшлэре алып барылды. Югары сыйныфлар өчен видеофильм күрсәтелде.

        Өзлексез экологик белем бирү системасын яклау һәм үстерү, экологик белемнәрне пропагандалау һәм яшь буынга экологик тәрбия бирү максатларында, 12 май көнне  безнең мәктәптә Бердәм экология дәресе үткәрелде. Аны география укытучысы Мөслимә Сәгыйтовна Баулы урман хуҗалыгы вәкиле Джусоев Владимир Борисович белән берлектә үткәрде. Бу зур чара Халыкара Экологик белем бирү көненә багышланды. 
         Бу дәрестә балалар лекторны кызыксынып тыңладылар, презентация карадылар.Презентация планетабызның матурлыгы һәм нәфислеге, аның турында кайгыртуның мөһимлеге, дөньядагы һәр нәрсәнең үзара бәйлелеге, табигатьне һәм бөтен Җир планетасында тереклекне саклауның һәрберебез өстендәге бурыч булуы турында иде. Презентация дә, тулаем дәрес тә үз максатларына ирештеләр дип санарга мөмкин. Дәрес соңында балалар тема буенча үзләрен кызыксындырган сораулар бирделәр. Мәсәлән, Баулы шәһәренең һәм Татарстанның экологик торышы, экологик программаларның нәтиҗәлелеге, республикабызда альтернатив энергия чыганакларыннан файдалану турында сорадылар. 
Аннан соң балалар дәрестә үзләштергән белемнәре, табигатьтә үз-үзеңне тотуның иң гади кагыйдәләре һ.б.ш. турында фикер алыштылар. 

Җиңү бәйрәме уңаеннан укучылар сугышта һәлак булган укытучылар истәлегенә мәктәп обелискына үзләре әзерләгән венок куйдылар.

Һәр елдагыча  9 май - Җиңү бәйрәме зур әзерлек һәм оешканлык белән узды. Мәктәп укучылары   ветераннарны котладылар, алар хөрмәтенә концерт күрсәттеләр.  

 Баулы шәһәре халкының мәшгульлеге үзәге профориентация һәм социаль адаптация буенча комплекслы эш алып бара. 

 Баулы шәһәренең  2 нче мәктәбендә  “Куркынычсыз тәгәрмәч” бәйгесе үткәрелде. 
Бу көнне бирегә районның барлык мәктәпләреннән укучылар килде. Алар 5 төр ярышта көч сынашты. Фигуралы йөрүдә велосипедчылар катнашты. Алар 12 төрле каршылыкны тиз арада һәм хатасыз үтәргә тиеш иде. 2 нче төр ярышта 10 сорауга тиз һәм дөрес җавап бирергә кирәк булды.   Юл хәрәкәте кагыйдәләре, беренче медицина ярдәме күрсәтү буенча  җавап тоттылар. Укучылар ярышларның бер төрендә дә сынатмады. Агитбригадалар да   чыгыш ясады.  

 3 нче май көнне безнең мәктәптә өмә үткәрелде. Барлык мәктәп укучылары мәктәп коллективы белән берлектә мәктәп территориясен чүп-чардан чистартты. Мәктәп яны матур булып калды. Моннан тыш бакчада да эшләрне башладык. 

Мәктәптә экологик субботник үтте.  Мәктәп янына яшел нарат үсентеләре утыртылды.