“2017 ел – экология елы !” – уңаеннан балалар белән төрле формада  эшчәнлек алып барыла. Шуларның  берсе, балалар өчен иң кызыклы һәм файдалысы – урманчы Марсель абый белән очрашу булды.  Низамутдинов М.  М. Лесхоз урман хуҗалыгында эшли. Ул мавыктыргыч, танып белүне үстерүгә  юнәлтелгән презентацияләр кулланып туган ягыбызның урманнары, анда яшәүчеләр һәм аларның тормышы турында сөйләде. Шулай ук Марсель Мингазович   балаларның урманнарда үз-үзләрен тоту кагыйдәләрен ничек белүләре белән кызыксынды, фикерләрен тыңлады. Очрашу бик файдалы узды.

“2017 ел – экология елы” – дип игълан ителде. Шул уңайдан балаларда  экологик культура башлангычлары тәрбияләү юнәлешендә күп төрле тәрбия чаралары алып барыла.  Рус теле тәрбиячесе  презентация кулланып, урманнарның кеше тормышында, яшәешендә зур урын алып торуын төшендерде. Балалар, урманнарны саклау, урманда үз-үзеңне тоту кагыйдәләре турында рус телендә үзләренең фикерләре белән уртаклаштылар. 

Менә тагын җиргә май ае килде. Язлар җиткән саен сагыш та, сагыну да арта. Халкыбызның батыр уллары канлы сугыш кырларында яулап алган җиңү бәйрәменә 72 ел тулды. Бүген тәүге зур бәйрәмне шатланып, олылап билгеләп үтәбез.

Һәр туар таң җирдә тыныч булсын,

Имин булсын иде дөньялар.

Аяз күгебезне болыт капламасын

Балкып янсын күктә йолдызлар.

Таш һәйкәлләр балкый тыныч кына

Өйрәнгәннәр алар тынлыкка.

Һәйкәлләргә килик! Гөлләр куйыйк!

Һәйкәлләрне тынлыйк тын гына.

            Матурлыгы өчен бу көннәрнең

            Кемнәр генә корбан булмаган!

 Исемнәрен тарих безгә үзе

 Саклап кала ерак еллардан.

МББУ дә Җиңүнең 72 еллыгы уңаеннан “Балтач – батырлар төбәге!” дип исемләнгән стенд булдырдык.

Батырлык. Бу купшы сүз түгел,

Хәтерләрдән тиз җуела торган.

Мәгънә — асылында, мәңгелеккә

Күңелләргә, җанга уела торган.

Кайсы тауның ташларыннан икән

Батырлыкка һәйкәл куясы?

Чорлар җиле ташларны да уя,

Тик мәңгелек хәтер кыясы!

Батырлык дип күпме сөйләп йөрмик,

Күпме аны күккә күтәрмик,

Ише бармы бөеклекнең солдат

Кылган батырлыкка тиңләрлек?

Кечкенәләр төркеме рәсем шөгылендә каенга яфраклар ясадылар. 

Язлар җиткәч тау башында

Яфрак ярыр ак каен

Шул каенга матур итеп

Бүләк ясадык бүген.

Авылым яме  - чишмәләр.

Бүген мәктәпкә әзерлек 1 төркеме балалары “Салкын чишмә” гә экскурсиягә барды. Максатлары: туган авыл чишмәләре белән танышуны,  чишмәләр һәм аларның кеше тормышында,  табигатьтә тоткан ролен өйрәнүне, аларны саклау  һәм алар турында кайгырту хисләре тәрбияләүне дәвам итү.

Челтер- челтер чишмә ага

Һич тә тыймалы түгел.

Ә сулары шундый йомшак

Эчеп туймалы түгел.

Без килдек чишмәбезнең

Хәл-әхвәлен белергә.

Тирә-ягын чистартып

Ихтирам күрсәтергә.

Әти-әниләр белән берлектә барлык төркемнәрдә “Әйләнә-тирә табигать, хезмәт һәм без!”, “Зелёная весна!”,  “Табигатьнең якын дусты – булсын иде һәр бала!”, “Табигать ул – безнең әни, табигатьне саклагыз!”, “Яшел яз -  2017” кебек темаларга газеталар ясалды, күргәзмәләр оештырылды. Гаиләләрдә балалар белән бергәләп табигатьтә ял һәм хезмәт итүне оештыру - әлеге  газеталарга  материал булды.

Ямьле яз җитте, көннәр җылынды.

Урамда саф һава сулап,

Рәхәтләнеп уйнар көннәр җитте.

Күрегез безне, булдырабыз -

Төсле түмгәкләрдән узабыз!

Йөгерәбез, сикерәбез,

Язның рәхәтен тоеп.

Балалар бакчасы коллективы язгы өмәләрдә бик актив катнаша. Табигатьне саклау, аның турында кайгырту, көч һәм мөмкинлектән килгәнчә ярдәм итү – барыбызның да изге бурычы икәнең онытмыйк.

Табигатьне саклыйк әле,

Саклыйк әле Җир шарын.

Елгаларны пычратмыйк,

Агачлар да утыртыйк.

Һаман көлеп торсын кояш,

Елгалар челтерәп аксын.

Безнең матур табигатькә

Бөтен дөнья соклансын!