Бакчада язгы эшләр тәмамлану алдында. Кишер, чөгендер, суган, бәрәңге утыртылды. Ишегалдын бизәү өчен бик күп төрле чәчәкләр чәчелде, рассадалар күчерелде. 

Бакчабызда матур булып,

Лаләләр чәчәк атты.

Ялдан килгәч бөтен бала

Яңалыкка шаккатты. 

Оста куллы хезмәткәрләр шундый матур гөлләргә җан өрделәр.

Бөрбаш авыл җирлеге уздырган праймерзда бакчабыз мөдире Шарифуллина Розалия Харисовна район советы депутаты буларак чыгыш ясады.

Бүген авыл уртасындагы һәйкәл янында Бөек Җиңүнең 70 еллыгына багышланган митинг булды. Митингка авылыбызның бердән-бер исән калган сугыш ветераны Нурҗиһан апа, сугыш чоры балалары һәм тыл ветераннары чакырылган иде. Бакчабызның мәктәпкә хәзерлек һәм зурлар төркемендә тәрбияләнүче балалары да кулларына чәчәкләр, флаглар, тынычлык кошы - күгәрченнәр тотып бәйрәм тантанасын карадылар.  

Бүген бакчабызда зур бәйрәм уздырылды. Бездә күп еллар шәфкать туташы булып эшләүче, Советлар Союзы герое Габдулла Гарифуллинның кызы Кәүсәрия ханым белән очрашу үткәрелде. Ул әтисе турындагы истәлекләр белән уртаклашты,  аның орден-медальләре белән таныштырды. Без Кәүсәрия Габдулловнаны якынлашып килүче Җиңү бәйрәме белән котлыйбыз. Аңа тормышында һәм эшендә зур уңышлар, сәламәтлек, озын гомер телибез.  

Советлар Союзы герое кызы Кәүсәрия Габдулловна балаларны Җиңүнең 50 еллыгы уңаеннан әтисенә бирелгән бүләкләр белән таныштыра. 

Советлар Союзы героеның шәхси архивында булган әйберләре белән танышу балаларга бигрәк тә ошады. Малайлар геройның фуражкасын да киеп карадылар.  

Бүген авылыбызның мәдәният йорты балаларның моңлы җырларыннан, дәртле биюләреннән, нәфис сүзләреннән шаулап торды. Чөнки анда балалар бакчасының зурлар һәм мәктәпкә хәзерлек төркемендә тәрбияләнүчеләрнең  зур иҗат концерты булды. Килгән кунаклар, әти-әниләр бәйрәм киченнән сөенешеп, балаларга һәм хезмәткәрләргә рэхмәтләр әйтеп, шатланышып таралыштылар. 

Зурлар төркеменә йөрүче Сәйфетдинов Җәлилнең әбисе Кәфия апаның балачагы сугыш чорларына туры килгән. Зурлар һәм мәктәпкә хәзерлек төркемендә тәрбияләнүче балалар белән очрашуда Кәфия апа шул турыда сөйләде, ирексездән күзләргә яшь килде. "Хәзерге матур тормышның кадерен белегез, күгебездәге кояшны "дошман" дигән болыт капламасын", - дип теләкләр теләде.