Туган  телебезне укучыларыбызга өйрәтү, аңа карата мәхәббәт тәрбияләү укытучыдан зур осталык, түземлелек сорый. Безнең бурыч балаларда милли үзаң, горурлык хисләре булдыру, һәм, иң мөһиме әхлаклы шәхес тәрбияләү. Без укучыларыбыз өчен укытучы апа гына түгел, без-киңәшче дә, ярдәмче дә.

    Туган тел-милли яшәешнең төп шарты. Тел язмышы - милләт язмышы белән тыгыз бәйләнгән. Без Татарстан җирендә яшибез икән, аның һавасын сулыйбыз икән, димәк без дә үз телебезне яхшы белергә тиеш.

   Безнең педагогик эшчәнлек укыту кысаларында гына калмый, укыту-тәрбия эшендә сыйныфтан тыш эшләргә дә зур әһәмият бирелә.

   Укучыларыбызны милли традицияләр, бәйрәмнәр, бөек кешеләр белән таныштыру максатыннан мәктәбебездә төрле чаралар үткәрелә. Февраль ае - Туган тел айлыгы дип игълан ителү дә,бу юнәлешкә уңай йогынты ясады. Атна дәвамында Өчиле төп гомуми белем мәктәбендә  һәр класста туган телебезгә багышланган тәрбия дәресләре үтте. Дәресләрдә Туган тел көне барлыкка килү тарихын,башка телләр һәм туган телебез- татар теле турында әңгәмә үткәрделәр.

  “Туган тел көне”уңаеннан  төрле кызыклы һәм файдалы чаралар үткәрелде. ”Тәрҗемә ит” , М.Җәлилнең туган көне уңаеннан  “Тамчы-шоу”  бәйгесе, ”Туган телем-Тукай теле” кичәсе, якташыбыз шагыйрь Радик Мөхәммәтнең шәхси әйберләреннән оештырылган күргәзмә, ”Чишмә башы” газетасы саннары белән танышу- укучылар өчен мавыктыргыч һәм тәрбияви әһәмияткә дә ия булдылар.