2015нче елның 26 январенда Татарстан Республикасы Арча муниципаль районы “Ташкичү төп гомуми белем мәктәбе” муниципаль бюджет гомуми белем учреждениясендә татар теле һәм татар әдәбияты укытучыларының “Төп мәктәптә ФГОСка күчү чорында татар теле һәм татар әдәбияты дәресләрендә яңа технологияләр куллану” темасы астында район күләмендә семинар уздырылды.  Бу семинарда миллилек,  телгә мәхәббәт, татар рухы традицияләрен үстереп, яңа технологияләр куллану шартларында балаларга белем һәм тәрбия бирү мөмкинлекләре ачып бирелде. Семинар “Рәхим итегез!” дип аталган әдәби-музыкаль кичә белән ачылды. Кичәдә милли рухтагы бию,  җырлар, сәнгатьле сөйләм – болар барысы да семинарда катнашучыларның рухын күтәрде.

    ФГОС нигезендә оештырылган башлангыч класслардагы дәресләр, 5,6 классларда татар теленнән узган дәресләр яңа технологияләр кулланып оештырылды. Укучыларга уйланырга, үз фикерләрен әйтергә, ялгышырга, ялгышларны төзәтергә мөмкинлекләр тудырылды.

   Семинар ахырында татар теле һәм әдәбияты укытучыларына 8 класс укучылары өйрәнгән Р.Батулланың “Кичер мине, әнкәй!” спектакле күрсәтелде. Тормыштагы гыйбрәтле хәлләр, яшьлектәге хаталарның төзәлмәс ярага әйләнүе, тормышта үз кыйблаңны таба белү кебек мөһим проблеманы чишү һәркемне тетрәнде. Семинар татар теле һәм әдәбияты укытучыларында тирән тәэсир калдырды.