24 нобрь көнне Ташкичү авылы мәдәният йортында алма төшәрлек тә урын калмаган иде. Бу көнне анда "Әнием, бәгырем!" дип аталган, әниләр көненә багышланган зур концерт булды. Концерт программасын 2009 нчы елда мәктәпне тәмамлаган Алинә Хәнәфиева төзеде һәм алып барды.

  2011 нче елның июнь ае. автоавария. Шул авариядә Алинә зур җәрәхәт алды. Мәктәптә укыган чорда концертлар алып барган Алинәнең яңадан сәхнә түрләренә менәсе, авылдашларына кирәкле булуын күрсәтәсе килә. Үзенә авыр чорда ярдәм иткән авыл халкына зур рәхмәтен шушы конөерт аша белдерәсе килә аның.

   Зал шыгрым тулы. Әнә Шушмабаш авылы җырчы-йолдызы Э.Гобәйдуллина, Яңа Кенәр авылыннан апалы-сеңелле Хәбибуллиналар, Илдус, Шекә авылыннан килгән үзешчәннәр, Ташкичү авылы егетләре һәм кызлары. Барысы да Алинәнең уй-фикерләре, аның тазару шатлыгы белән уртаклашырга килгәннәр. 

   Бик рәхәтләнеп ял иттеләр авылдашлар. Алинә әниләрне бәйрәм белән котлады, авыр вакытта үзенә зур ярдәм күрсәткән авылдашларына рәхмәт белдерде, армый-талмый үзен тазарту өстендә эшләгән әнисенә баш иде. Әниләрнең һәрвакытта да бөек булып калуларына дан җырлады.

   Рәхмәт сиңа, Алинә! Авыр чакларда баш имәвең, кыен минутларны җиңеп чыгуң өчен зур рәхмәт! Без сине яратабыз!