Габдулла Тукай - балалар әдәбиятының гаять дәрәҗәдә ярлы булуын күреп, аңа "хәлдән килгәнчә" ярдәм итү, баету, хезмәтләре һәм әдәби әсәрләре аша дөрес тәрбия бирү омтылышы белән әлеге өлкәгә килгән шәхес. Балалар әдәбиятында ул, әлбәттә, иң элек шагыйрь буларак кадерле. Шагыйрьнең зур күпчелек иҗаты халык поэзиясе белән сугарылган. Халык авыз иҗатыннан килгән акыл, зиһен, үткенлек - болар барысы да шагыйрь илһамының һәм уңышының башлангычы булып исәпләнергә хаклы.
Тиздән, 26 апрельдә, Габдулла Тукайның тууына 139 ел була. Шул истәлекле дата уңаеннан, башлангыч сыйныф укучылары белән шигырь бәйрәме үтте. Укучылар шагыйрьнең шигырьләрен сөйләделәр, аның сүзләренә язылган җырларны җырладылар. Бәйрәм татар халкының гимнына әйләнгән "Туган тел" җырын күмәк башкару белән тәмамланды.