Авыл хуҗалыгы профиле кысаларында мәктәпләрдә уку-укыту процессын оештыру - илнең күп кенә төбәкләрендә инде берничә ел гамәлгә ашырылучы тәҗрибә.“Әлеге эшнең төп максаты - балаларга һөнәри юнәлеш бирү, чыгарылыш сыйныф укучыларын аграр профильле уку йортларына керергә җәлеп итү. Мәктәптә үк авыл хуҗалыгы нигезләрен өйрәнеп, укучылар бу юнәлештә уку өчен саллы белем багажы ала, ә үсемлекчелек һәм терлекчелек үзенчәлекләре белән практикада таныша.
     Бу эш безнең мәктәбебездә узган уку елында башланды һәм 2024-2025 нче уку елында да дәвам итә. Шул максатны күз уңында тотып, аграрсыйныф укучылары туган ягыбызның иген кырларына, ындыр табагына сәяхәт кылдылар. Бүгенге сәяхәттән балалар күп кызыклы мәгълүмат алдылар. Аларда икмәкнең кыйммәте турында күзаллау формалашты, аны кадерләргә, валчыгын да әрәм итмәскә кирәклегенә тагын бер кат инандылар. Икмәкнең борынгы заманнарда һәм хәзер ничек үстерелүе турында белемнәр баетылды. Икмәк - күп кешеләрнең зур хезмәте нәтиҗәсе икәнен үз күзләре белән күрделәр.
    Мондый сәяхәтләр һәм башка чаралар аграрсыйныфта бердәм укыту системасын булдыра һәм укучыларда авыл хуҗалыгына һәм производствога карата кызыксыну формалаштыра.