" Туган телем сагында" акциясе кысаларында, 6 нчы сыйныфларда "Татар халкының милли киемнәре" исемле сыйныф сәгате узды.
Сыйныф сәгатенең максаты - милли сәнгать әсәрләре турында төшенчә бирү; татар халкының милли киемнәре (түбәтәй, калфак, читек)  һәм бизәнү әйберләре (беләзек, чулпы, изү) белән таныштыру; балаларда милләтебезнең рухи мирасына ихтирам хисләре тәрбияләү.

        Татар халкы, башка халыклар  кебек үк, элек-электән үзенә генә хас булган милли киемнәре белән аерылып торган. Киемнәрдә халыкның рухи дөньясы, милли үзенчәлекләре чагылган.Бигрәк тә безнең сылу кызларыбыз,  яшь киленнәребез үзләренең кием-салымнарына игътибарлы булганнар. Кызлар каз өмәләренә, аулык өйләргә, кунакка  бару өчен махсус күлмәкләр тектергәннәр, ә яшь киленнәр исә, чишмәгә суга барганда да, үзләренең  гүзәллекләрен күрсәтү өчен, иң матур киемнәрен кигәннәр.Милли киемнәребездә ата-бабаларыбызның  шөгыльләре, hөнәрчелеге, башка халыклар белән аралашулары да чагылыш тапкан. Бу киемнәр  аны киеп йөрүче кешенең шәхси, социаль хәлен, яшен, характерын, эстетик зәвыгын күз алдына китерергә мөмкинлек биргән. Әлбәттә, чорлар  алмашу белән, кием-салым да үзгәрешләр кичергән. Ул кешенең яңалыкка hәм камиллеккә омтылышы белән ярашкан. Бу омтылыш бигрәк тә хатын-кыз киемендәге үзгәрешләрдә чагылыш тапкан.