Безнең төп бурычыбыз- баланың табигать тарафыннан бирелгән сәләтен үстереп, аны иҗади шәхес итеп тәрбияләү. Белгәнебезчә, укыту өлкәсендә сәләтле укчыларны табу, аларның эшчәнлеген үстерү – хәзерге көндә төп бурычларның берсе булып тора. Укучыларның сәләтен никадәр тизрәк күрәбез, үстерәбез, уңай шартлар тудырабыз, шул очракта гына көтелгән уңышларга ирешә алабыз. Сәләтле укучылар белән эшләү системасы, хәзерге заман шартларында зур җаваплылык сорый дип әйтергә кирәк. Чөнки сәләт – бары тик дөрес оештырылган эшчәнлектә генә үсә.

Һәрбер кеше үзенең мөмкинлекләреннән, үз кызыксынуларыннан чыгып, олы тормыш юлына аяк баса.Һәм шул ук вакытта, ул шуннан чыгып һөнәр сайлый.

Мәктәпнең җимеше- укучыларның иҗади казанышлары ул. Гомумән алганда, һәр уңышка ирешүнең сәләт- талант нәтиҗәсе генә түгел, ә тырышлык нәтиҗәсе икәнен беләбез.Әгәр дә без укучыларның сәләтен дөрес юнәлештә үстерә алабыз икән, ул аннан соң берничә өлкәдә үзенең талантын күрсәтә алачак.Бу уңайдан татар теле һәм әдәбияты дәресләре-укучылар эшчәнлеген активлаштыру, иҗади фикерләү өчен бик тә уңайлы җирлек.

Сәләтле укучылар белән эшләү максатын күз уңында тотып, "Сәләтлеләр Университеты" проекты эшләп килә. Мәктәбебез укучылары "Сәләтлеләр Университеты" укуларында катнашып кайттылар. Киләчәктә дә аларга уңышлар теләп калабыз.