Районыбызда зур чара – “Дус сыйныф серләре” дигән ата–аналар комитетлары республика бәйгесенең район этабы булды. Максаты – балаларны тәрбияләүдә белем бирү оешмалары һәм ата–аналар бердәм булып эшләгән иң яхшы коллективны барлау, аларны башкаларга үрнәк итеп күрсәтү, популярлаштыру һәм башкалар. Бәйге өч номинациядә үтте.  Укытучылар, ата–аналар, балалар бер команда булып чыгыш ясады.Безнең мәктәптән 7 нче сыйныф укучылары, аларның әти-әниләре чыгыш ясады. Беренче булып жюри әгъзалары “Дус сыйныф серләре” дигән күргәзмә белән таныштылар. Анда ниләр генә юк – фотоальбомнар, стена газеталары, плакатлар, бергә эшләгән иҗади проектлар, портфолио, кул эшләре – бәйләгән, чиккән, теккән әйберләр һәм башкалар.Чиратта – визит карточкасы, ягъни иң күңелле, дус сыйныф белән танышу. Монда инде командаларга бөтен булган фантазияне, осталыкны эшкә җигәргә кирәк иде. Һәм алар бу мөмкинлектән файдаландылар да. Тәрбия процессында мәктәп өчен ата–аналар – иң көчле союзниклар.  Конкурста катнашкан 7 сыйныф укучыларына, аларның класс җитәкчесе Гибадуллина Гөлия Марсил кызына, әти-әниләргә зур рәхмәт.