Мәктәп яны тәҗрибә участогы - менә дигән тәҗрибә үткәрү урыны ул. Монда укучылар биология дәресләрендә үзләштергән белемнәрен практикада кулланалар, үсемлекләрнең үсеш процессын күзәтәләр, коллектив белән бердәм эшләргә өйрәнәләр, башлангыч сыйныф укучылары да төрле тәҗрибәләр үткәрәләр.Иң күңелле вакыт - бакчада уңыш җыю. Эре-эре яшелчәләрне күмәкләшеп җыйганда балаларның йөзләреннән шатлык, канәгатьләнү хисе бөркелә.  Бакчабызда ел әйләнәсе үзебезгә ашарга җитәрлек яшелчә, җиләк-җимеш үстерелә. Быел мәктәп бакчасыннан  карлыган,  кыяр, помидор, кабак,  чөгендер, суган,  кишер алынды. Кәбестә уңышы куандырырлык булды. Ә пешекчеләребез җыелган уңышның берсен дә әрәм итмиләр: карлыганнан кайнатма ясыйлар, туңдырып куялар; кыяр, помидор һәм кәбестәне тозлыйлар, төрле салатлар ясыйлар. Бу кадәр мул уңышны үстерү өчен бик күп көч, тырышлык һәм сабырлык кирәк. Мәктәп яны тәҗрибә кишәрлегендә эш җәй көне генә түгел, ә ел әйләнәсе бара."Хезмәтнең яңгыры - тир, алмасы - алтын", - дип белми әйтмәгән әби-бабаларыбыз. Мәктәп тәҗрибә кишәрлегендә эшнең бер максаты мул уңыш, табыш алу булса, ә иң мөһиме - укучыларыбызга хезмәт тәрбиясе бирү һәм җиргә мәхәббәт тәрбияләү. Эш белеп үскән укучыларыбыз, мәктәпне тәмамлап, олы тормыш юлына чыккач та сынатмаслар, тормыш авырлыклары алдында югалып калмаслар дип ышанабыз.