Бүгенге көндә милләтләр дуслыгы, конфессияара мөнәсәбәтләрнең ныклы булуы аеруча мөһим. Этник, социаль нигездә төрле низаглар килеп чыгуларны кисәтү, террорчылыкка юл куймау, мондый ямьсез күренешләргә карата җәмәгатьчелектә тискәре караш уяту максатында ел саен «Экстремизмга - Юк!» дигән айлык үткәрелә. Мәктәбебездә 1-30 сентябрьдә шундый айлык үткәрү турында план төзелде. Айлык барышында төрле чаралар үткәрелә. «Экстремизмга - Юк» айлыгы кысаларында 4 сентябрьдә класс сәгатьләре узды. Укучылар арасындагы «Без халыклар дуслыгы яклы» дигән темага иншалар һәм рәсемнәр бәйгесе дә шушы теманы чагылдыра. Бала мәктәп яшеннән үк террорчылыкның нинди зур фаҗигаләргә, югалтуларга китерүен аңлап үсәргә тиеш.  Иң мөһиме, террорчылыкка юл куймаска, аны вакытында кисәтә белергә, һәркайда уяу булырга, акны карадан аера белергә кирәк. Бигрәк тә милләтләр, төрле дин әһелләре арасында низаг тудыруга юл куелмаска тиеш. Бер-беребезгә хөрмәт, төрле милләт вәкилләре арасында бердәмлек, дуслык булганда террорчылыкка юл ачылмас.