Сабантуй бәйрәме – татар халкының йөзек кашы булган зур бәйрәмнәрнең берсе. Ул – хезмәт һәм дуслык бәйрәме. Без бай тарихыбызны, тирән мәгънәле милли көйнең матурлыгын, бөек шәхесләребезнең әсәрләрен, татар халкының гореф-гадәтләрен, йолаларын күз карасыдай сакларга тиеш. Кызганычка каршы, балалар буыннан-буынга күчеп килгән милли гореф – гадәтләрнең югалып бару чорында яшиләр. Татар халкының моңлы җырлары, дәртле биюләре, кызыклы уеннары балаларның күңелләрендә уелып калсын өчен бакчабызда Сабантуй бәйрәме булып узды. Милли кием кигән балалар һәр төркемгә кереп сабантуй турында җырлар, шигырьләр сөйләделәр, бүләкләр җыйдылар, бәйрәмгә чакыру өләштеләр. Бәйрәм бакчабыз мәйданчыгында үткәрелде. Кунакка килгән Җәй кызы, Кояшкай, Аю һәм Әминә балаларга бик күп төрле татар халык уеннары уйнатты: чиләк белән су ташу, ат чабышы, кашыкка йомырка салып чабу, чүлмәк вату, бүләк кисү һ.б. Һәрбер балага үзенең осталыгын күрсәтергә мөмкинчелек бирелде: кемдер җырлады, кемдер биеде, кемдер шигырь сөйләде. Бәйрәмнән бер бала да бүләксез китмәде. Бакчада оештырылган әлеге чара балаларның һәм әти-әниләрнең күңеленә бик хуш килде.