Бөек Ватан сугышында җиңүнең 80 еллыгын бәйрәм итү кысаларында, Ватанны саклаучылар елы уңаеннан, 25нче апрель көнне безнең балалар бакчасында “Стихи, рожденные войной” – “Сугыш тудырган шигырьләр” дип исемләнгән төбәкара шигырь сөйләүчеләр конкурсы булып узды. Чараның максаты: сугыш темасына багышланган шигырьләр белән танышу, балаларның  иҗади фикер йөртү осталыгын, танып-белү мөстәкыйллеген үстерү, батыр сугышчыларыбызга карата  горурлык хисе, әйләнә-тирәдәге кешеләргә, үткәнебезгә карата игътибарлылык тәрбияләү. Бәйге ике өлештән торды: беренче – сайлап алу турына 120 гариза һәм видеоязма кабул ителде,  икенче тур - финалга 41 катнашучы узды. Әлеге күркәм чарада Саба, Кукмара, Биектау, Яшел Үзән, Теләче, Әтнә, Балтач,  Арча районнарыннан, шулай ук Казан, Азнакай, Нократ Аланы шәһәрләреннән дә катнашучылар бар иде. Балалар сугыш турында шигырьләрен яттан сөйләп иҗади осталыкларын күрсәттеләр, мәртәбәле жюри тарафыннан бәяләнделәр. Барлык катнашучыларга җиңүче дипломы тапшырылды. Күп еллар үтсә дә, сугыш тудырган шигырьләрнең әһәмияте, тәэсир итү көче кимеми, киресенчә, көчәя генә бара. Илебезгә тынычлык килсен, күгебез аяз булсын! Сугыш афәтләрен күрергә язмасын!