Март ае экологик бәйрәмнәргә бай. 20 март – Җир көне булса, 22се – Су көне билгеләп үтелә. Шул уңайдан, “Алдынгылар хәрәкәте” проекты кысаларында, мәктәп белән балалар бакчасы арасындагы дәвамчанлык планы нигезендә, «Ашыт» дәүләт табигый тыюлыгы хезмәткәрләре катнашында, 21 март көнне,  бакчабызда “Без – табигать балалары” дип исемләнгән экологик викторина булып үтте. Әлеге чарада Арча шәһәренең 11нче, 8нче номерлы балалар бакчасы балалары һәм 2нче номерлы мәктәп укучылары экология буенча белем сынашты. Балалар әйләнә-тирә табигатьнең бай, матур һәм чиксез күп төрлелеге турында күзаллауларын киңәйттеләр. Алар "сәяхәткә чыгып"  экологик биремнәр үтәделәр, әйләнә-тирә дөнья һәм аның иминлеге турында белемнәрен арттырдылар. “Алдынгылар хәрәкәте” көенә флэш-моб биеделәр. Бәйгене мәртәбәле жюри -  "Ашыт" дәүләт тыюлыгы хезмәткәрләре Рәшит Зиннур улы Әхмәтҗанов һәм Гөлнара Ильяс кызы Габдрахманова бәяләде. Алар чараны йомгаклап балаларга үзләренең киңәшләрен, теләкләрен җиткерделәр  һәм бүләкләрен тапшырдылар.