Урамда карлы, салкын кыш. Бу вакытта салкын җилләрне җиңеп, нәни канатларын җилпеп азык эзләүче кошларга бик кыен. Алар безнең ярдәмгә бик мохтаҗ. Канатлы дусларыбызга  ярдәм итү йөзеннән без балалар арасында "Кышын кошларга ярдәм итик!"  мәрхәмәтлелек акциясе игълан итәргә уйладык. Шунысы сөенечле: бик күпләр әлеге акциягә теләп кушылдылар, тиз арада үзләренең эшләрен алып килделәр. Җимлекләр арасында ниндиләре генә юк! Йорт кебекләре дә, төрле бизәкләр төшерелгәннәре дә. Мәрхәмәтлелек  акциясендә катнашучылар  күңел җылыларын салып эшләгән җимлекләргә сокланмый  мөмкин түгел! Салкын көннәрдә безнең җимлекләргә килеп җим чүпләүче нәни дусларыбызны күрү күңелләргә канәгатьлелек , рәхәтлек хисләре бирә.