18.04.2015 көнне, укучылар белән берлектә, мәктәп диварына Бөек Ватан сугышында Җиңүнең 70 еллыгына багышланган баннер куелды, әңгәмә үткәрелде. Бөек җиңүнең әһәмияте, авылдашларыбызның җиңүгә керткән өлеше турында кабат искә төшердек.

Бүген 18 апрель көнне укучылар һәм мәктәп коллективы өмәгә чыктылар. Алар территорияне җыештырып, сөенеп кайтып киттеләр.

2015 елның 17 апрелендә “Казан арты” тарих-этнография музеенда Арча районы мәктәпләренең югары класс укучылары арасында “Моңлы сазым” дип исемләнгән әдәби-музыкаль кичә үтте. Бу кичәдә безнең мәктәптән 9 класс укучысы Уваева Вераника Леонидовна (җитәкчесе Э.В.Абдуллина) катнашты. Ул тамашачылар игътибарына Габдулла Тукайның “Ана догасы” шигырен тәкъдим итте. 

15 апрельдә “Пирамида” күңел ачу үзәгендә “Илһам” бөтенроссия яшь язучылар конкурсының йомгаклау кичәсе үтте. Мәктәбебезнең 7 класс укучысы Романова Алия (җитәкчесе Г. Б. Мостафина) “Проза”  номинациясендә I дәрәҗә диплом һәм премия алу өчен сертификат белән бүләкләнде.  Җиңүчеләрне ТР мәгариф һәм фән министры Энгель Фәттахов бүләкләде. Алиягә иҗади уңышлар телибез, безне тагын да матур әсәрләре белән сөендерер дип ышанабыз.  

15 нче апрель көнне, Ташкичү мәктәбендә, волейбол буенча зона ярышлары булып узды. Әлеге ярышта Носы мәктәбенең волейбол командасы да катнашты. Егетләр бу ярышта үз көчләрен сынап карадылар. Аларга алга таба да уңышлар теләп калабыз!

Укучыларыбыз "Молодежное движение" математика конкурсыннан 1,2 һәм 3 дәрәҗәдәге дипломнарга ия булдылар. Уңышлар телибез.