Һәркайсыбызның иң кадерле кешесе – әнисе бар. Кирәк чакта иркәләгән, вакытында шелтәләгән, еласаң – юаткан, безнең өчен төн йокыларын калдырган, өйләрне – ямьле, ашларны тәмле иткән Әни бит ул! Аннан да изгерәк кем бар тагын?! Җәмгыятебездә әниләрнең ижтимагый әһәмиятен күтәрү максатыннан Россия Федерациясе Президентының 1998 елның 30 гыйнварында чыккан №120 номерлы карары нигезендә Россиядә ноябрь аеның сонгы якшәмбесе ел саен “Әниләр көне” булып билгеләп үтелә. Быел ул 29 ноябрьгә туры килә. Матур, җылы бәйрәм ул, чөнки мең, миллион кабат әйтелгәнчә, дөньяда әнидән дә якын, аннан да кадерле, аннан да мәрхәмәтле зат юк. Мәктәбебезнең башлангыч сыйныф укучылары әлеге бәйрәмгә “чын көч” белән әзерләнә башладылар. Алар әниләренә матур-матур бүләкләр ясыйлар, җыр-биюләр өйрәнеп, матур шигырьләр ятлап бәйрәм кичәсе әзерлиләр.