Әй, күңелле дә соң САБАНТУЙ!Капчык киеп йөгерү ярышында малайлар белән беррәттән кызларыбыз да катнашты. Алардан калышмыйча җиңү яулаган кызлар да булды. Күзне бәйләп чүлмәк вату ярышы да озак көттермәде. Балалар тиз арада бер-берсенең артына тезелеп тә бастылар. Чүлмәкне җиткер генә. Аннан чираттагы ярышыбыз кашыкка йомырка салып йөгерү булды. Балалар бер дә аптырап тормадылар, кашыктан йомыркалары төшеп калса да, тәрбиячеләре янына беренче йөгереп килергә  тырыштылар. Ә намуслырагы, төшкән йомыркасын алам дип,  артка да калды. Сабантуйда барлык балалар да бик теләп, кызыксынып катнашты. Өлкән  төркем балаларыннан калышмыйча, безнең кечкенә төркем балалары да бик мавыгып уйнадылар. Ярышлар туктап  торган арада балалар шигырьләр  сөйләделәр, җырладылар, биеделәр. Күз бәйләп, уенчыклар  кистеләр. Һәрбер ярыш нәтиҗәләре буенча бүләкләр бирелеп  барылды. Балаларга бүләкләрне балалар бакчасы коллективы, авылдашлар, әти-әниләр әзерләде. Бүләкләр әзерләп, кечкенә сабыйларыбызның күңелләрен  күтәргән өчен аларга бик зур рәхмәт әйтәсе, эшләрендә уңышлар,  гаиләләрендә  тынычлык телисе килә. Сабантуйда бер генә бала да бүләксез калмады. Бәйрәм  бик  күңелле үтте. Балалар да, өлкәннәр дә рәхәтләнеп күңел ачты.