Мәктәп укучылары белән берлектә Тукаебызның туган көн бәйрәмен уздырдыкБыел халкыбызның бөек шагыйре Габдулла Тукайның тууына 130 ел тула. Һәр чорда шагыйрьне зур ихтирам белән искә алалар. Вакытлар узган саен Тукай әсәрләренә игътибар, аларның әһәмияте, тарихи миссиясе арта. Тулыр-тулмас алты ел гына иҗат итеп калган әдипнең үзе исән чагында ук 33 китабы дөнья күргән. Ятим, мескен Апуштан Мөхәммәтгариф улы Габдулла бөек шагыйрь - Тукайга, халык, милләт хадименә әверелә.Тукай - татарның гына түгел, башка төрки халыкларның да сөекле әдибе. Ул исән чагында ук шактый танылган шагыйрь булган. Г.Ибраһимов һәм башка кайбер язучылар Тукайны тәнкыйть утына тотса да, аның иҗаты халыкка бик якын. Тукай - милләт язмышы өчен янып, кайгырып яшәгән әдип.Апрель ае Тукайны тудырган да, якты дөньядан алып та киткән. Бу кадәр ачы, каһәрләнгән язмышка дучар ителгән башка шагыйрь юктыр да. Егерме җиде яшендә, әле гөрләтеп иҗат итәрдәй бер чорда ул бакыйлыкка күчә. Тукайны соңгы юлга озату да тарихта беренче мәртәбә, шуңа чаклы күрелмәгәнчә киң яңгыраш ала...