2012нче елның 27нче гыйнвар көнендә Яңа Кенәр лицеенда «Җиде юл чатында» дип исемләнгән студентлар белән очрашу кичәсе оештырылды. Элеге кичәнең беренче өлешендә уку йортларыннан килгән мөхтәрәм кунаклар чыгышы, алар белән әңгәмә булып узды. Арча педагогия көллияте, Арча аграр сәнагать көллияте һәм әлеге көллиятнең беренче номерлы филиалыннан килгән мөгаллимнәр чыгарылыш сыйныф укучыларын үз уку йортлары белән таныштырып, ачык ишекләр көненә чакырдылар.
    Алга таба танышу этабын укучылар һәм студентлар арасында оештырылган уен-ярыш дәвам итте. Өч бәйгедән торган бу көч сынашуда төркемнәр игътибарлылык, белем, иҗат, җитезлек ягыннан сыналдылар. Мавыктыргыч һәм файдалы узган әлеге уен студентларның җиңүе белән тәмамланды.
    Кичә, билгеле, җыр-моң, матур биюләр, сәхнәләштерелгән күренешкә бай иде. Укучылар да, студентлар да үзләренең сәләтләрен күрсәтте.
    Әнә шулай бай эчтәлекле, кызыклы, файдалы кичә иде әлеге очрашу.