Декабрь ае кердеме, укытучылар һәм укучылар ничегрәк күңелле итеп бәйрәм оештырырга икән дип уйлана башлый. Район олимпиадалары уздырылу вакыты һәм чирек ахыры булуга карамастан үзенчәлекле чыгышлар да әзерләргә өлгерә алар.
Быелгы ел да искәрмә булмады. 27 һәм 28 нче декбрь көннәрендә лицейда гөрләп Яңа ел кичәләре узды. Беренче көн бәйрәмдә югары сыйныф (9-11) укучылары катнашса, икенче көн башлангыч һәм урта өлеш укучылары осталыкларын күрсәтте. Һәр сыйныфка Яңа ел кичәсен уздыру өчен темалар бирелде. 9-11 нче сыйныфлар “Кыш.Спорт.Сәламәтлек” , ә 5-8 нче сыйныфлар “Кайсы ел ни китерә?”  темасын ачып бирергә тиешләр иде. Елдагыча алдынгы укучылбарны рәхмәт хатлары белән бүләкләү, чыршы утларын кабызу, Кыш бабай һәм Кар кызын каршы алу белән башланып киткән кичәләр җыр-бию, уен-көлке, тапкыр сүз белән дәвам итте. Бәйрәм ахырында лотерея уйнатылып, һәркем кичәдән бүләк алып кайтып китте. Жюри тарафыннан сыйныфларның чыгышы, стенгазеталар һәм маскарад киемнәре бәяләнде. Шулай итеп бәйрәм ахырына иң-иңнәр ачыкланды.
       
Беренче чиратта Яңа ел кичәләрен оештырган һәм алып барган 3Б, 6А, 10Б сыйныфларына “афәрин!” диясе килә. Алар чын мәгүнәсендә зур эш башкардылар. Шулай ук калган сыйныфлар да бик тырышып әзерләнгән иде. Югары һәм башлангыч өлештәге сыйныфлар барысы да рәхмәт хатлары белән бүләкләнде. Ә урта өлештәге 5А һәм 5Б сыйныф чыгышларын иң яхшылары дип таптылар. Стенгазета чыгару буенча һәр сыйныф мактауга лаек. Ә иң-иңнәр исемлегенә 9А, 9Б, 9Г сыйныфлары керде.
Аерым рәхмәтле һәм мактау сүзләрен Кыш бабай ролен башкаручы укытучыларыбыз Ренат Файзрахмановка, Радик Фатхулинга һәм Кар кызы булучы 10Б сыйныф укучысы Галяутдинова Ләләгә җиткерәсе килә.
     Әнә шулай күңелле һәм файдалы узды быелгы 2011нче елны озату 2012нче елны каршылау кичәләре. Якынлашып килүче ел мөбарәк булсын!