Җырчы, Россия балалар фондының Татарстан бүлекчәсе җитәкчесе Салават Фәтхетдинов ничә еллар  инде балалар йортлары, интернат мәктәпләре белән аралашып яши. Әлеге аралашу гади күрешеүләрдән генә түгел, балаларга җылы сүз, дустанә мөнәсәбәт, төрледә-төрле бүләкләр, җыр-биюдән дә гыйбарәт.

Быел исә Салават әлеге эшен “Яшь ТНВ” белән берлектә дәвам итә. 16нчы май көнне җырчы “Яшь ТНВ” каналында даими баручы “Җырлы-моңлы балачак” фестивале җиңүчеләре, яшьләр каналының алып баручылары белән Яңа Кенәрлеләргә ял концерты бүләк итте. Әлеге концерт барышында залда утыручы укучылар үзләре өчен үрнәк булырдай яшь башкаручылар белән танышты, ә авылыбызның олы буын вәкилләре рәхәтләнеп ял итеп кайтып китте.

Җырчының Яңа Кенәр авылына килүенең төп максаты – даими күрешеп, ярдәм итеп торган интернат-мәктәп укучылары белән тагын бер кат күрешү. Балаларга концерт күрсәтү белән бергә, Салават аларга велосипедлар бүләк итте. “1 нче июнь – Балаларны яклау көнендә кайларда буласымны төгәл белмим, шуңа Кенәргә алданрак килергә булдым. Беркемне дә игътибарсыз калдырасым килми,” – диде Салават телевидениега биргән интервьюсында. Ә укучылар үз чиратларында җырчыны, районыбыздан килгән хөрмәтле кунакларны сәхнәгә алып менеп биетте, осталыкларын күрсәттеләр