Еллык планны  гореф-гадәтләрне югалтмаска тырышу максатыннан милли бәйрәмнәребезне кертеп төзибез. Ел саен Нардуган, “Карга боткасы”, Нәүрүз һәм башка  бәйрәмнәрне  үткәреп барабыз. Бу көннәрдә мәктәбебездә  игелек, дуслык бәйрәме булган Нәүрүзне каршы алдык.

Элек Нәүрүз бәйрәме көннәрендә олылар, әби-бабайлар, өйдә матур киемнәрен киеп, махсус нәүрүз намазларын укыганнар. Гаиләгә, илгә, дәүләт башлыкларына исәнлек, тынычлык, бәхет, зур уңышлар теләп, озак-озак итеп дога кылганнар, хәерле яңа ел килүен сораганнар. Нәүрүз бәйрәмнәре мөселман халкын киләчәккә якты өмет белән карарга өйрәткән, аларга яңа көч-дәрман, дәрт биргән, аларны тормышны яратырга өйрәткән.

Без бу бәйрәмне укучыларыбыз белән үткәрдек. Бәйрәм үткәрү алдыннан балаларга бәйрәм турында мәгълүмат бирәбез, шигырьләр, җырлар өйрәнәбез. Быелгы  бәйрәмгә башлангыч сыйныф укучыларын кунакка чакырдык. Бәйрәм кунаклары Буранбикә һәм Нәүрүзбикә булдылар. Буранбикә берничек тә Нәүрүзбикәгә юл куярга теләмәде. Балалар төрле ярышларда катнашып, Буранбикәне җиңәргә тырыштылар һәм Нәүрүзбикәне уен-көлке белән каршы алдылар.

Нәүрүз көн белән төн тигезләшкән чорга – 21–22 мартка туры килә. Көнчыгыш календаре буенча әлеге төбәкләрдә язны каршылау язгы чәчү эшләре алдыннан үткәрелә торган халык бәйрәменнән гыйбарәт.

Бәйрәм җыр-биюләр белән үрелеп барды, балалар рәхәтләнеп күңел ачтылар. Максатыбыз - бәйрәм аша балаларда халкыбызның йолаларына, гореф-гадәтләренә  кызыксыну уяту һәм  мәрхәмәтле, игътибарлы, әхлаклы балалар тәрбияләү. Менә шулай күңелле итеп үзды Нәүрүз бәйрәме.