1 – 21 нче июньдә Яңа Кенәр лицее базасында  «Шатлык» лагере эшләде. Смена “Җиһангирлар – галәм балалары” исеме астында үтте. Лагерьның эш программасында һәр көн бер планета исеме белән аталыып төзелгән иде һәм шул эчтәлектә үтте. Мәсәлән, “Очрашу”, “Уеннар”, “Ачышлар”, “Традицияләр”, “Туристлар”, “Матурлык”, “Галәм” һ.б. Көннең беренче яртысында вожатыйлар тарафыннан занятиеләр үтте. Ял итүчеләр аппликация, оригами, музыка, бию серләренә өйрәнделәр. Смена барышында күп кенә кызыклы шәхесләр белән файдалы очрашулар үтте.  Уйлап табучылар һәм камилләштерүчеләр җәмгыятенең президиум әгъзасы Р.Г.Нуруллин укучыларны ничек уйлап табарга һәм уйлап тапкан әйбергә патент алу серләренә төшендерде. “Җиһангирлар” отряды җитәкчесе Гайнетдинов Х.Ш. барлык укучыларны дә  могьҗизалы галәм серләре белән таныштырды. Арча һәм Яңа Кенәр янгын сүндерү идарәсе хезмәткәрләре, Габдулла Тукай исемендәге Арча педагогика коллияте укытучылары белән очрашулар да бик мавыктыргыч  булды. Лагерь вожатыйлары тарафыннан «Бәхетле очрак”, “Без – галәм балалары”, “Рәхим ит,Универсиада”, “Йолдызлы эстафета”, “В.Терешкова – галәм серләрен ачучы”, “Урман могҗизалары”, “Музыкаль тартмачык», «Ике йолдыз», «Табигать белән дуслашыйк”, “Кичке карнавал”, “Экотеремок”, “Татарстан – бөек Болгар оныгы”  дип аталган күңел ачу чаралары тиешле дәрәҗәдә үтте. Смена дәвамыында ял итүчеләр Валентина Терешкова исемендәге аллеяны карап, тәрбияләп тордылар. Төрле тематиканы эченә алган рәсем, кул эшләре бәйгеләрендә актив катнаштылар.