2011нче елның 31нче мартында Яңа Кенәр урта мәктәбе башлангыч сыйныфының бер төркем укучылары Кырлайда булып кайтты. Бирегә шулай ук Иске Чүрилеләр дә килгән иде. Аларны музей, мәктәп һәм “Кырлай” кунакханәле күңел ачу комплексы хезмәткәрләре җырлы-уенлы программа белән каршы алды.

Иң элек музей каршында кышны озату, язны каршылау – Нәүрүз бәйрәме узды. Габдулла Тукай әсәрләреннән төзелгән күренеш, Кыш бабай һәм Нәүрүзбикәнең ярышы белән башланган концерт-тамаша бергәләп бию белән тәмамланды. Алга таба чучела яндырылды һәм укучыларны карга боткасы белән сыйладылар. Программаның дәвамы саф һавада уеннар иде. Ике мәктәп үзара ярышканнан соң, бизәлгән чаналы атларга утырып укучылар музей тирәли йөрде. Аннан соң музейга экскурсия, балалар өчен сөекле шагыйребез Габдулла Тукайның тормыш һәм иҗат юлы белән танышу булды. Элеге экскурсиядә укучылар бер-бер артлы сораулар яудырды, фотога төштеләр. Шулай итеп, укучылар белем туплап, күңел ачып,зур тәэсирләр белән төшке аштан соң мәктәпләргә таралышты.