27 нче  гыйнвар – Ленинград шәһәре фашистлар блокадасыннан азат ителгән көн. Бөек Ватан сугышының  79 нчы көнендә, ягъни 1941 елның 8  сентябрендә, немец фашистлары, Ленинград шәһәрен чолгап алып, аны илебезнең  башка төбәкләре белән элемтәсен өзгән. Сугышка кадәр Ленинградта 3 млн 421 мең кеше яшәгән. Блокада елларында шуның 1,5 миллионы үлгән. Һәм 1944 нче  елның 27 нче гыйнварында, 900 көннән соң гына Ленинград блокадасы өзелә.

Шушы аянычлы көннәрнең тарихы турында гимназиянең “Беренчеләр хәрәкәте”нә йөрүче 9 нчы А сыйныфы укучысы Сабирова Азалия 5 нче сыйныф укучылары белән әңгәмә оештырды. Ленинград блокадасында калучы балаларның көндәлекләрен укыды. Икмәккә, суга тилмереп үлгән кешеләр язмышы турында сөйләде. Бу сөйләшү балаларда икмәкне олылау һәм тыныч тормышыбызның кадерен белү хисен тагын бер тапкыр арттырды.