Электронное образование Республики Татарстан

Бүген гимназиянең актлар залында беренче сыйныфка укырга керүче укучыларның әти-әниләре өчен җыелыш булды. Әти-әниләр балалар белән бергә килделәр. Гимназия директоры И.Р. Исмәгыйлев, укыту эшләре буенча директор урынбасары Л.А. Нигматуллина укыту-тәрбия буенча булган барлык мөмкинлекләр турында сөйләде, беренче укытучылары белән таныштырды, һәркайсына алда зур уңышлар теләде.
Яңа укучыларыбыз гимназиянең бүлмәләре: спорт залы, китапханә, ашханә, чишенү бүлмәләре белән таныштылар.
Хәерле сәгатьтә булсын! Сезне өстәмә әзерлек сәгатьләрендә көтеп калабыз.

Бүген Арчаның 3 нче номерлы башлангыч мәктәбендә "Балачагым шигырьләре" дигән район күләм шигырь укучылар бәйгесе узды. Анда район мәктәпләренең 1-4 сыйныфларыннан 79 талантлы укучы катнашты. Безнең гимназияне 4 нче Б, 1 нче В, 2 нче А, 2 нче Б сыйныфы укучылары лаеклы тәкъдим итте. Конкурс талант һәм артистлык сынавына әверелде.
1 нче урынга Госманова Зилә, 4 нче Б сыйныфы укучысы лаек булды (кл. җитәкчесе Ниҗамиева Г. М.).
3 нче урын - Фәйзрахманова Назгөл, 1 нче В сыныфы укучысы (кл. җитәкчесе Борһанова Э. М.).
Катнашучы сертификаты белән Сафина Ралинә, 2 нче А сыйныфы укучысы (кл. җитәкчесе Гарифуллин Д. Ф.),
Сабирова Сафия, 2 нче Б сыйныф укучысы (кл. җитәкчесе Гайнетдинова Г. Р.) бүләкләнделәр. Талантлы укучыларыбызны һәм аларның остазларын чын куңелдән котлыйбыз! Алга таба да уңышлар телибез!

МБГБУ - Арча 5 нче гимназиясе “Урта Бирәзә башлангыч гомуми белем мәктәбе” филиалында 3 нче чирекнең соңгы уку көне вакыйгаларга бик бай булды.
1 апрель - Халыкара кошлар көне уздырыла. Шул уңайдан, мәктәпкә   ТР Дәүләт биологик ресурслар комитетының “Ашыт” дәүләт табигый тыюлыгы белгечләре  чакырылды, Зур Бирәзә авылы китапханәсе  белән берлектә, “Безнең канатлы дусларыбыз” исемле чара үткәрелде.
Чарада кошлар турында кызыклы фактлар, аларның төрләре, табигатькә  файда китерүләре, аларны саклау кебек темалар яктыртылды. Укучылар үзләренең белемнәрен тикшерделәр, шигырьләр сөйләделәр, җырладылар, кошларга ярдәм итәргә, аларны сакларга кирәклегенә кабат инандылар.
Кунакларны озаткач, укучылар Нәүрүз кызын каршы алып, ярыш-уеннарда көч сынашып, “карга ботка”сыннан авыз итеп, коймаклар белән чәй эчеп, яхшы кәеф белән өйләренә таралыштылар.