Нәүрүз  – төрки һәм фарсы телле халыкларның бик борынгыдан килгән бәйрәме. Ул 21 мартта көн белән төн тигезләшкән вакытка туры килә. Фарсы теленнән ул “яңа көн” дип тәрҗемә ителә. Нәүрүз – язгы бәйрәм. Бу гүзәл бәйрәм көнендә кешеләр бер-берсенә кунакка йөриләр, җырлыйлар, бииләр, рәхәтләнеп күңел ачалар.

Бүген гимназиядә халкыбызның йолаларын, гореф-гадәтләрен балаларга өйрәтү максатыннан "Хуш киләсең,  Нәүрүз!" дигән бәйрәм үткәрдек. Укучылар бәйрәмнең тарихы, килеп чыгышы белән таныштылар. Сәхнәләштерелгән кичә башта актлар залында үткәрелде. Яз хәбәрчеләре каргалар туган ягыбызга кыш алып килгәч, Кыш бабай белән Нәүрүз кызы үз көчләрен сынаштылар. Сынауларда Нәүрүз кызы җиңеп чыккач, Кыш бабай,  балаларга матур теләкләр теләп, китеп барды. Аннары балалар җыелышып, “ карга боткасы” ашадылар. Соңыннан бәйрәм урамда җыр, бию, ярыш-уеннар белән дәвам иттерелде. Балалар төрле ярышларда теләп катнаштылар, рәхәтләнеп ял иттеләр.