Башлангыч сыйныфлар белән “Фольклор иленә сәяхәт” дигән кичә үткәрелде. Бу чараның максаты:  балаларны фольклор әсәрләре белән таныштыруны дәвам итү, рухи һәм әхлак тәрбиясе бирү . Чара башында балаларга фольклор, жанр төрләре турында тулы мәгълүмат бирелде. Кичә барышында балалар белән сынамышлар, әйтемнәр, тизәйткечләр, мәкальләр, такмазалар, санамышлар, табышмаклар искә төшерелде. Җырлы-биюле уеннар балаларга бик ошады.Халкыбызның гореф-гадәтләре, йолалары, тормыш-көнкүреше чагылыш тапкан бу уеннар балаларда өлгерлек, тапкырлык, ярдәмләшү, шулай ук кешелеклелек, шәфкатьлелек, сабырлык кебек күркәм сыйфатлар тәрбияли. Чараның икенче өлешендә балалар белән “Кәрия-Зәкәрия”, “Күрсәт әле үскәнем”, “Йөзек салу”, “Чума үрдәк, чума каз”, “Йөзек салыш”, “Түбәтәй” кебек җырлы-биюле уеннар уйналды. Чарага куелган китап күргәзмәсенә күзәтү ясалды.