3 нче декабрь – Халыкара инвалидлар көне. Шул уңайдан илебездә 1 нче декабрьдән 10 нчы декабрьгә кадәр инвалидлар декадасы уздырыла. Сәламәтлекләре чикле булуга карамастан, күпләребез алардан нык, чыдам булырга, иң мөһиме - тормышны яратырга өйрәнә ала. Алар һәр мизгелнең кадерен тоя, һәр көнне шатланып каршы ала беләләр. Күпләре язмыш сынауларына баш имичә, ныклы ихтыяр көче, түземлек, сабырлык, тырышлык аша авырлыкларны җиңеп чыга.
       28 нче ноябрь көнне Ашытбаш авыл мәдәният йортында инвалидлар декадасы кысаларында “Мәрхәмәтлек тамчысы белән күңелләрне җылытыйк!”дип аталган очрашу-кичә булды. Бу кичәдә мәктәп укучылары физик мөмкинлекләре чикләнгән булуга карамастан, авырлыкларга бирешмичә, тормыштан ямь табып яшәүче егетләр белән таныштылар. Чистяков Николай һәм Пиговаев Дмитрийга тормышта һәрбер адым авырлык белән бирелсә дә, сынмый-сыгылмый, бүгенге көнгә рәхмәтле булып яшиләр. Янәшәдә ныклы терәк – әниләре. Егетләр үзләре белән таныштырдылар, укучылар кызыксынган сорауларга җаваплар бирделәр, үзләренең матур моңлы җырларын бүләк иттеләр. Аларга сокланмый калырга мөмкин түгел! Киләчәк көннәрендә дә шундый нык ихтыярлы, тормыш яратучан егетләр булып, авырлыкларга бирешми, куйган максатларына ирешерләр дип ышанып калабыз.