Илебез буенча 1 октябрьдә Өлкәннәр көне билгеләп үтелә. Бу көннәрдә хөрмәтле олыларны котлаулар белән искә алабыз, бүләкләр бирәбез. Әлбәтта, өлкәннәр безнең игътибарыбызны бу көндә генә түгел, һәрдаим тоеп яшәргә тиеш.

Әлеге бәйрәм – буыннар бердәмлеге, еллар бәйләнеше символы, шулай ук әти-әниләребезгә, әби-бабайларыбызга, сугыш, хезмәт ветераннарына, өлкән яшьтәгеләргә  күпьеллык намуслы хезмәтләре, тормыш тәҗрибәләре, игелекләре өчен җылы рәхмәт сүзләребезне ирештерү мөмкинлеге.

Укучыларда хезмәт ветераннарына – олыларга хөрмәт, өлкәннәргә игътибар, ихтирам хисе тәрбияләү максатыннан мәктәбебез дә бу чарадан читтә калмый. Быел да башлангыч сыйныф укучылары үзләренең якыннарына матур открыткалар ясап бүләк иттеләр. Түбән класс укучылары укытучылар белән берлектә мәктәп һәм балалар бакчасында эшләп лаеклы ялга чыккан хезмәткәрләрнең өйләренә барып, бәйрәм белән котладылар, күчтәнәчләр һәм кулдан ясалган открыткалар бүләк иттеләр. Өлкән класс укучылары ярдәмгә моһтаҗ әбиләрнең хәлләрен белделәр, ярдәм оештырдылар. Өлкәннәребез балаларны сөенеп каршы алдылар, рәхмәтләрен, матур теләкләрен әйтеп озатып калдылар.