Бүген  мәктәбебездә «Арча хәбәрләре» газетасы  призына традицион шахмат бәйгесенең чираттагысы башланып китте. Быел да ул үзенчәлекле уза . Беренчедән,  узган елдан башлап бу дәрәҗәле ярышлар хәзер район үзәгеннән читтә, авыл мәктәпләрендә уза һәм аның географиясе дә киңәя. Быелгы ярышларда да район мәктәпләре командаларыннан тыш күрше Балтач районы укучылары да катнаша. Икенчедән, быелгы турнирны үткәрү тәртибе дә үзгәреш кичерде. Хәзер шахматчылар яшь категорияләренә бүленеп уйный : башлангыч сыйныф, 5-6 һәм 7-9 сыйныфта укучы малайлар һәм кызлар аерым көч сынаша. Бу киләчәктә республика ярышларына районыбызның иң көчле шахматчы балаларын сайлап алу өчен дә кулай. Чөнки анда бәйгеләр нәкъ шул тәртиптә үткәрелә.

 Турнирны ачу тантанасына район башкарма комитеты җитәкчесе урынбасары Рамил Гарифҗанов  килде. Ул яшьләргә уңышлар теләде, бәйгене оештыручыларга, катнашучыларга рәхмәтен җиткерде. Киләчәктә дә районыбызда спортны җәелдерүгә зур игътибар биреләчәген билгеләп китте. Газетаның баш мөхәррире Исрафил Насыйбуллин мәктәп коллективына бәйгене кабул итеп алганнары, тренерларга балаларны туплап алып килгәннәре өчен рәхмәт әйтте, киләсе елларда да бу матур традициянең дәвамлы булачагына ышаныч белдерде.

       Ярыш башланды. Аның нәтиҗәләре  көн дәвамында билгеле булачак.

       Барыгызга да уңышлар!