Районыбызда Габдулла Тукайның тууына 130 ел тулу уңаеннан "Тукай дөньясына сәяхәт" дигән Бөтенроссия акциясе  кысаларында "Яттан сөйлә Тукай шигырьләрен,-шушы булыр иң зур бүләгең" дип исемләнгән нәфис сүз конкурсы булып узды. Мәктәпнең 9 нчы сыйныф укучысы Сибгатов Илшат "Сөбханалла" шигырен яттан сөйләп 1 урын алды. Конкурста 3 нче сыйныф укучысы Ибрагимова Камилә дә катнашып уңышлы чыгыш ясады. Булдырасыз, балалар!!

24-30 нчы апрель көннәре республикабызда "Иммунизация буенча Европа атналыгы" буларак билгеләп үтелде. Галимнәребез "Вакцинация-сәламәт милләт" дип юкка гына әйтмиләр. Авылыбыз фельдшеры Гөлинә Абдуллина башлангыч сыйныф укучыларына прививкалар һәм аларның файдасы турында сөйләде, киңәшләр бирде.

20 апрель Россиядә "Донор көне" буларак билгеләп үтелә. Класс җитәкчесе Миләүшә Шириязданова 6, 9 класс укучыларына донор булуның изге гамәл икәнен, авырулар, юл һәлакәтенә очраган кешеләр өчен кирәклеген аңлатты. "Мактаулы донор", аның льготалары турында сөйләде.

16 апрельдә "Спорт сөюче Татарстан" акциясе кысаларында Апаста волейбол ярышлары узды. Безнең мәктәпнең егетләр командасы 2 урын алып кайттылар. Молодцы,егетләр!

Китапханәче Ибрагимова Сиринә бөек шагыйребез Габдулла Тукайның 130 еллыгы уңаеннан күргәзмә оештырды. Бу эчтәлекле күргәзмәдә шагыйрьнең балачагы, тормыш юлы, иҗаты белән танышырга мөмкин. Чара укучыларда зур кызыксыну уятты.

18 апрель-Дуслык көне. Мәктәптә һәр сыйныфта дуслык дәресләре үтте. Башлангыч сыйныф укучылары "Нәрсә ул дуслык?", "Дус нинди була?" сорауларына җавап эзләсә, 6-9 нчы сыйныфларда исә дуслык турында әңгәмәләр  бик җанлы үтте. 

12 апрель -Космонавтика көне. Моннан 55 ел элек "Восток" кораблендә Юрий Алексеевич Гагарин беренче тапкыр космос киңлекләренә очты. Ул 108 минут дәвамында Җир шары тирәли бер әйләнеш ясап исән-сау җиргә төште. Безнең укучыларыбыз арасында  шул уңайдан  рәсем конкурсы оештырылды. Башлангыч класс укучылары аеруча активлык күрсәттеләр.

13 апрельдә мәктәптә 9 нчы сыйныф укучылары Бердәм республика имтиханына әзерләнү максатыннан диагностик тест эшләделәр. Аларга уңышлар телик!

Мәктәптә коррупциягә каршы төрле чаралар үткәрелә.Укучылар тарих, җәмгыять дәресләрендә, класс сәгатьләрендә бу турыда күп мәгълүмат алалар. 6-9 класслар өчен  шушы темага кагылышлы төрле сөйләшүләр, "БДИ һәм коррупция", "Коррупцияне ничек булдырмаска", "Нәрсә ул коррупция" темаларына класс сәгатьләре үткәрелде. Башлангыч класс укучылары арасында "Нәрсә ярый, нәрсә ярамый" темасына әңгәмәләр үткәрелде.

7 апрель-сәламәтлек көнендә мәктәптә "Без ГТО га әзер - берләшегез" дип исемләнгән Бөтенроссия акциясе кысаларында спорт бәйрәме узды. Барлык укучылар да актив катнашып үзләрен спортны сөючеләр итеп таныттылар. Молодцы!