Төсләр – иң беренче чиратта, эмоцоиналь үсешкә йогынты ясый. Көй кешенең күңел кичерешләрен ачып биргән кебек, төсләр дә һәркемнең эчке кичерешләрен күрсәтә ала. Әйтик, якты, җете төсләр(кызыл, кишер сары, сары, ачык яшел) беренче карашка ук уңай кичерешләр тудыра. Шуңа күрә, балаларның кәефе әйбәт булганда, алар, ачык төсләр кулланып, рәсем ясый башлый.

Төсләр әйләнә тирә дөньяның матурлыгын күрү мөмкинлеге генә түгел. Төс безнең дустыбыз, ярдәмчебез, ә кайвакытта дәвалаучы табибка да әверелергә мөмкин. Төсләрнең йогынтысы барлык кеше өчен бер үк түгел. Бу шәхеснең әйләнә тирәне психологик кабул итү үсешенә бәйле.

Галимнәр төсләрнең төрле предмет белән ассоцияциясенә бәйле үзенчәлеген күрсәтә. Әйтик, күпләр өчен кызыл төс җылылык һәм күтәренке кәеф чыганагы булып тора. Кызыл ут һәм кан белән ассоцияцияләнә. Ә зәңгәр төс – тыныч, болытсыз күк йөз яки тыныч диңгез өстен хәтерләтә. Кара – караңгылык, билгсезлекне.