16 мартта Алексеевск бистәсендәге Г.С.Боровиков исемендәге 3нче мәктәптә укучылар һәм районның татар теле, әдәбияты укытучылары өчен оештырылган “Әдәби кунакханә” проектының быел унберенче очрашуы булып узды. Бу проект әдәбият һәм сәнгать вәкилләре белән очрашулар оештыруга нигезләнә.
“Әдәби кунакханә”нең быелгы кунаклары Татарстан Язучылар берлеге әгъзасы, татар язучысы, шагыйрь, журналист, «Безнең мирас» журналының баш мөхәррире, ” Татарстанның атказанган сәнгать эшлеклесе” ,Татарстан Язучылар берлегенең Шәйхи Маннур һәм Абдулла Алиш исемендәге премияләр , Муса Җәлил , Габдулла Тукай исемендәге Дәүләт премияләре лауреаты- Ләбиб Лерон белән танылган якташыбыз, «Татарстан Республикасының Атказанган матбугат һәм массакүләм коммуникацияләр хезмәткәре», «Татмедиа» җәмгыятенең «Татар- информ» агентлыгы журналисты Надия Вәзыйх кызы Шәйхетдинова булдылар.
Очрашуда Ләбиб Леронның тормыш юлына һәм күпьяклы иҗатына күзәтү ясалу белән беррәттән, язучының бик мавыктыргыч,мәгънәле чыгышлары тыңланды. Мәктәп укучылары тарафыннан Ләбиб Лерон сүзләренә җырлар җырланды, аның төрле жанрдагы әсәрләре укылды. Тамашачылар тарафыннан рәхмәт сүзләре әйтелде, якты, ямьле, истәлекле, бик файдалы очрашу булды , дип бәяләнде.
Проект авторы, очрашуны алып баручы Кутуева Роза Мәгъсүм кызының әйтүе буенча, “Әдәби кунакханә” нең быелгы очрашуы “Укытучы һәм остаз елы”нда районыбыздагы татар теле һәм әдәбияты укытучылары өчен бер бүләк булды.