40 ел мәктәп директоры

 Сугыштан соңгы еллар. 1947 елның салкын гыйнвар ае. Сәлимҗан абый белән Бәдерхаят апа гаиләсендә бер малай дөньяга килә. Бала түп- түгәрәк, сау-сәламәт була. Малай дөньяга килгәнлеген раслап, аваз сала. Улына Сәлимҗан абзый, нәселебез кимемәсен, нык, таза булсын дип,   Нургазиз исеме  куша. Яшьтән үк кул арасына керә малай. Мәктәптә тырышып укыган егет Казан Дәүләт педагогия институтында физика-математика укытучысы белгечлеге  ала. Аннары Ватан алдында изге бурычын үтәргә армия сафларына китә. Ә аннан эшне сагынып кайта: 2 көн ял иткәч, солдат киемен дә салып тормыйча, район мәгариф бүлегенә эш белешергә китә. Биредә аны Брехова Ираида Павловна каршы ала һәм Зур Тигәнәле мәктәбенә эшкә билгели. Һәм 40 ел Нургазиз абый әлеге мәктәпнең директоры һәм физика укытучысы булып эшли. Мәктәп һәм укытучылар  өчен кышка утын әзерләү, яңа мәктәп төзетү, аның  түбәсен алыштырып яптыру һәм башка зур эшләрнең башында торды ул. Физика буенча дәресләр генә түгел, матур-матур кичәләр дә балалар күңелендә  тирән эз калдыргандыр, мөгаен. Билгеле, 40 ел мәктәп җитәкчесе булып эшләү маңгайларга тирән буразналарны шактый мулдан салган. Әмма ул үкенерлек итеп яшәмәде: матур итеп гаилә корды, уңышлы итеп эшләде, ике кыз үстерде, алар тормышта үз урыннарын тапты, инде 3 оныгы куандыра. Җырдагыча “карчыгым да янымда, пенсиям дә җитәрлек” дип әйтергә дә мөмкин.