28 нче апрель көнне Актаныш районы Такталачык төп гомуми белем бирү мәктәбендә Әтиләр советының чираттагы утырышы узды. Чарада район мәгариф бүлеге җитәкчесе Шакирова Р.М, аның тәрбия эше буенча урынбасары Мусина Г.М., методист Зиннурова Р.Р., мәктәп директорлары һәм Әтиләр советы җитәкчеләре катнашты. Утырыш эшлекле формада үтте.

Кунак буларак, ялгызы ике бала тәрбияләп үстергән әти - Такталачык табиблык амбулаториясе җитәкчесе, гомумпрактика табибы, табиб-нарколог, атказанган табиб Минхуҗин Ленар Сәүбән улы, лаеклы ялдагы мөгаллим, музыка җанлы шәхес  Фәйрушин Камил Батырхан улы катнашты.

Кунакларны укучылар әтиләре турында язылган шигырьләре белән каршы алды. Шулай ук сәнгать мәктәбе филиалының рәсем бүлегендә шөгыльләнүче балалар иҗатына багышланган күргәзмә эшләде. Үз һөнәрләренең остасы булган әтиләрнең хезмәтләрен бәяләп бирелгән мактау һәм рәхмәт хатлары, оста куллы әтиләр ясаган җиһаз-предметларны туплап әзерләнгән күргәзмә дә беркемне дә битараф калдырмады. Якташыбыз М.Мутин исемендәге музейда кунакларны укучыларыбыз тематик чыгышлары белән каршы алды.

Такталачык Әтиләр  советы рәисе Әюпов Айнур Шамил улы әтиләр һәм балалар, мәктәп белән берлектә алып барылган эшкә анализ ясады. Мәктәптә тәрбия эшен оештыруны чагылдырган видеоязма каралды. Чара Әтиләр советының күчмә символын тапшыру һәм күмәк фотога төшү белән тәмамланды.