Рәсәй күләмендә уздырылучы "Гагарин елмаюы" акциясенә мәктәбебез теләп кушылды. Акция укучыларны ил космонавтикасы, космосны беренче ачучыларның батырлык казанышлары үрнәгендә тәрбияләү, укытучылар һәм укучылар игътибарын космонавтика тематикасына җәлеп итү максатларын үз эченә ала. 57 ел элек, 1961 елның 12 апрелендә Ю. А. Гагарин кешелек тарихында беренче булып космоска юл ала. Бу көнне ул “Восток“ космик корабында Җир тирәли әйләнеп чыга һәм Саратов өлкәсенең Смеловка авылы янында җиргә уңышлы төшеп утыра. Әлеге уникаль очыш нибары 108 минут дәвам итә, әмма ул кешеләргә космоска юл ача. Мәктәбебездә акция кысаларында сыйныф сәгатьләре үткәрелде, 12 апрель көнне исә, 5-8 сыйныф укучылары үзләрен очучы-сынаучы роленә куеп карадылар. Чара физика һәм информатика укытучысы Р.Р.Гайсинның мәгълүмати блогыннан башланып, технология укытучысы Ф.Ш.Нуриев җитәкчелегендә ясалган төрле модель самолетлар очыру белән дәвам итте. Иң  оста очучы-сынаучылар дипломнар белән бүләкләнде.