Язгы каникуллар быел шактый үзгә үтте. Ел дәвамында “энә белән кое казып”, алдынгылар сафына күтәрелгән укучылар, аларның мөгаллимнәре үз хезмәтләренә лаеклы бәя алды. Халыкара, Рәсәйкүләм, Республика фән олимпиадаларында җиңү яулаган укучылар, аларны әзерләгән укытучылар район сәхнәсенә күтәрелеп хөрмәтләнде, аларга акчалата бүләкләр тапшырылды.

3 апрель көнне “Ел укытучысы - 2018”, “Ел тәрбиячесе - 2018”, “Ел сыйныф җитәкчесе - 2018” “Ел педагог-оештыручысы - 2018”, “Ел өстәмә белем бирү педагогы - 2018” ,“Ел педагог-психологы - 2018” Республикакүләм бәйгенең муниципаль этабы җиңүчеләрен, лауреатларын бүләкләү тантанасы уздырылды.

- “Ел укытучысы” республикакүләм бәйге – ул педагогларның һөнәри осталыгына бәя бирә торган бик мөһим бәйге. Һәр укытучы үзен бу бәйгедә сынап карарга бурычлы, - дип мөрәҗәгать итте Энгель Нәвап улы залда утыручыларга, - һәм мин моны бурыч итеп куям. Киләсе уку елында районның һәр мәктәбе әлеге республикакүләм бәйгенең муниципаль этабында катнашырга үз укытучысын әзерләргә тиеш. 

Безнең мәктәптән "Ел укытучысы" бәйгесендә номинациядә җиңүче рус теле һәм әдәбияты укытучысы А.М.Шәемова, "Ел сыйныф җитәкчесе" бәйгесендә номинациядә җиңүче А.М.Фазылов бүләкләү тантанасында катнашты.