Бүген безнең мәктәптә җирле шагыйрә, язучы Фәния Хәйдәр кызы Әгъзамова белән очрашу кичәсе булды.  Фәния Хәйдәровна  гомерен балаларны укыту-тәрбияләүгә багышлаган  мөгаллим, туган җирен яратучы, иҗат, сәнгать дөньясында кайнаучы хөрмәтле шәһәрдәшебез.

     Кичә барышында шагыйрә үзенең иҗаты, шигырьләре  турында сөйләде. Шигырь язганда илһам алу чыганаклары, хисләрнең ничек тууы турында үзенең фикерләре белән уртаклашты.  Укучылар да шагыйрәгә кызыксындырган сорауларын  бирделәр. Фәния Хәйдәровна балаларның сорауларына бик теләп җавап бирде, яшь буынга тормышчан киңәш-теләкләрен, үгет-нәсыйхәтләрен дә җиткерде. Шаян шигырь, табышмаклар әйтеп, балаларны уйнатып та алды, җиңүчеләргә бүләкләр дә тапшырды.  Укучылар соравы буенча, шагыйрә үзенең  балалар өчен язылган шигырьләрен  дә укыды.

      Очрашу җылы һәм күңелле дулкында үтте. Мондый җанлы аралашу  укучыларыбызга  әдәби мирасларыбызның мөһимлеген тирәнрәк аңларга  ярдәм  итәр дип ышанабыз.