25 нче ноябрь көнне  гимназиядә "Яшь буында милләтара дуслык тәрбияләү” дигән тема астында семинар булып үтте. Семинарда районыбызның тәрбия эшләре буенча директор урынбасарлары, соц.педагоглар һәм педагог-оештыручылар катнашты. Семинар темасы гимназиянең тәрбия эшләре буенча директор урынбасары Гатиятуллина Р. С. һәм 6 нчы сыйныф җитәкчесе Малахова В. З. чыгышлары аша ачылды. Сыйныф җитәкчесе В. З.Малахова үз сыйныфында төрле милләт балаларын туплау һәм алар белән кызыклы чаралар үткәрүе турында үз тәҗрибәсе белән уртаклашты. Семинар барышында гимназиядә дәрестән соң тәрбия эшенең оештырылуы күзәтелде. Укытучылар, түгәрәк җитәкчеләре тарафыннан ачык эшчәнлекләр күрсәтелде, килгән кунакларга мастер-класс үткәрелде. Килгән кунаклар фикер алышу вакытында әлеге теманың актуаль булуын ассызыклап, киләчәктә дә яңадан яңа уңышларга ирешүебезне теләп калдылар. Семинар тәрбия эшенең оештырылуы буенча тәҗрибә уртаклашу белән йомгакланды.