Укытучы һөнәре җир йөзендә иң изге һөнәрләрнең берсе. Зәй муниципаль районында Педагог һәм остаз елына карата чаралар үткәрү дәвам итә. Татар гимназиясе укучылары С.Рәфыйков исемендәге үзәк китапханәдә районыбызның ветеран укытучысы Әгъзамова Фәния Хәйдәр кызы белән очрашуда катнашты. Фәния Хәйдәровна үзенең яшьлек еллары, укытучы һөнәрен сайларга юнәлеш биргән остазы турында сөйләде, студент елларыннан кызыклы хатирәләр белән уртаклашты, укучыларга үзе язган шигырьләрен укыды. Шулай ук әлеге кичәдә якташ язучыбыз Татарстанның атказанган мәдәният хезмәткәре, шагыйрь һәм композитор Разим Вәлиуллин турында истәлекләр тыңланды, аның шигырьләре укылды. Бәясен берни белән дә үлчәп булмый торган, еллар үткән саен кыйммәте арта гына барган әдәби хәзинә укучылар күңеленә хуш килде. Бу хәзинәне, үзенең иҗатын туган халкына бүләк иткән, мәңгелек мирас итеп калдырган хөрмәтле язучыларыбыз турында чара һәркемнең күңелендә якты истәлек булып сакланыр.