Бүген  районыбыз үсешенә  зур өлеш керткән күренекле шәхес, 1999 – 2007 нче елларда Зәй районы башлыгы булып эшләгән Ринат Шәехович Фәрдиевнең  исемен мәңгеләштерүгә  тагын бер адым ясалды: татар гимназиясе бинасында мемориаль такта ачылды. Мемориаль такта ачу тантанасында   Зәй муниципаль районы башлыгы  Кәримов Разиф Галиевич,  Ринат Шәеховичның тормыш иптәше Фәридә Хафизовна Фәрдиева,  гомерләрен  гимназиядә яшь буынны тәрбияләүгә багышлаган ветеран укытучылар,  хөрмәтле кунаклар,  гимназия коллективы һәм укучылары  катнашты. Ринат Шәехович Зәебездә үзенең якты эзен, онытылмас исемен калдырды. Ул  киләчәк буын  өчен искиткеч үрнәк, үз җиренең чын патриоты булды, яшь буынның якты киләчәгенә чын күңелдән ышанды, моның өчен үзенең көчен дә кызганмады, ару – талуны белмичә эшләде.  Бүген куелган  истәлек  тактасы  укучыларыбызга Ринат Шәеховичның   якты  истәлеге турында һәрвакыт искә төшереп торсын. Әлеге мемориаль тактаны  куюга ярдәм күрсәткән районыбыз җитәкчелегенә  чын күңелдән зур рәхмәтләребезне җиткерәбез.