5 март көнне гимназиягә танылган татар язучысы, күренекле шәхес, туган тел язмышына зур игътибар бирүче Рабит Батулла килде. Ул даими эзләнүдә, күп кенә романнар, повестьлар, хикәяләр, пьесалар авторы. Рабит Батулланың эшчәнлеге югары бәяләнде. Аңа «Татарстанның атказанган сәнгать эшлеклесе» исеме бирелде. Әдәбият өлкәсендә ирешкән уңышлары һәм актив җәмәгать эшчәнлеге өчен ул Гаяз Исхакый исемендәге премиягә, шулай ук Габдулла Тукай исемендәге премиягә лаек булды. Мондый атаклы кеше белән аралашу укучыларыбыз өчен зур вакыйга булды. 6 нчы сыйныф укучылары «Әбидә кунакта» әкиятен сәхнәләштерделәр. Аннан сүз язучының үзенә бирелде. Ул сорау-җавап форматында аралашуны сайлады. Сораулар төрле яктан сибелде, укучылар шултиклем мавыгып киттеләр, гүя үзләренең бабайлары белән сөйләштеләр. Аксакал математиканы да, географияне дә, музыканы да читләтеп үтмәде. Язучы балаларны үзенең зирәклеге белән шаккатырды. Ул көнне аңа безнең мәктәп музее буйлап экскурсия үткәрелде. Очрашу менә шулай тәмамланды да. Күңелне соклану һәм горурлык хисләре биләп ала, чөнки без шундый күренекле кеше белән очраштык. Танылган язучы белән очрашу бик тиз үтеп китте.